Россияда ноқонуний ишлаган 7 нафар хорижлик депортация қилинади
Канск округи полицияси томонидан ўтказилган текширувлар давомида ишлаб чиқариш корхоналаридан бирида ноқонуний меҳнат фаолияти билан шуғулланиб келган 7 нафар хориж фуқароси аниқланди. Мазкур шахслар Россия ҳудудига қонуний асосда кириб келган бўлсалар-да, тегишли рухсатномаларсиз ишлашган.
Текширув вақтида хорижликлар ўзларини «экотуризм» ва «тадбиркорлик» мақсадида корхона фаолияти билан танишаётган меҳмонлар деб тушунтиришга уринишган. Бироқ, уларнинг виза мақсадлари ҳақиқий фаолиятига мос келмаслиги аниқлангач, бу важлар инобатга олинмади.
Полиция ходимлари ҳар бир хориж фуқаросига нисбатан иккита маъмурий баённома расмийлаштирди. Россия Маъмурий ҳуқуқбузарликлар тўғрисидаги кодексининг 18.8 ва 18.10-моддаларига биноан, улар жаримага тортилди ва мамлакатдан назорат остида мустақил равишда чиқиб кетиш (депортация) мажбурияти юкланди.
Шунингдек, ушбу мигрантларни ноқонуний равишда ишга қабул қилган корхона раҳбариятига нисбатан ҳам текширув ишлари олиб борилмоқда. Иш берувчилар қонунбузарлик учун қонунчиликда белгиланган тартибда жавобгарликка тортилади.
