Благовешченскда 7 нафар хорижлик Россиядан мажбурий чиқариб юборилади

Амур вилояти ИИБ ходимлари томонидан Благовешченск шаҳрида хорижликлар кўп тўпланадиган жойларда навбатдаги профилактик рейдлар ўтказилди. Текширувлар давомида 100 нафардан ортиқ мигрантнинг ҳужжатлари ва Россияда бўлиш қонунийлиги назоратдан ўтказилди.

Текширув натижасида 7 нафар хориж фуқароси мигратсия қонунчилигини бузганлиги учун маъмурий жавобгарликка тортилди. Улар Россия Федератсияси Маъмурий ҳуқуқбузарликлар тўғрисидаги кодексининг 18.8-моддаси 1.1-қисми бўйича айбдор деб топилди. Ушбу модда хорижликларнинг Россияда бўлиш тартибини бузиши, хусусан, яшаш ҳуқуқини тасдиқловчи ҳужжатларнинг йўқлиги ёки белгиланган муддат тугагач чиқиб кетмаслик ҳолатларини назарда тутади.

Қонунбузарлик содир етган ҳар бир шахсга 5 минг рубл миқдорида жарима белгиланди. Шунингдек, суд қарори билан уларни Россия ҳудудидан мажбурий чиқариб юбориш тўғрисида қарор қабул қилинди. Ҳозирда ушбу шахслар чиқариб юборилиш жараёнини кутиш учун вақтинча сақлаш ҳибсхонасига жойлаштирилган.

Расмийлар томонидан маълум қилинишича, бундай қўшма рейдлар Амур вилояти ҳудудида мунтазам равишда ўтказиб келинмоқда. Мигрантлардан ўз ҳужжатларини доимо тартибда сақлаш ва Россия мигратсия қонунларига риоя қилиш сўралади.