Новороссийскда 58 нафар мигрант маъмурий жавобгарликка тортилди: қоидабузарлик оқибатлари

Россия ИИВнинг Краснодар ўлкаси бўйича бошқармаси ходимлари Новороссийск шаҳрида миграция қонунчилигига риоя этилишини назорат қилиш бўйича профилактик тадбирларни ўтказди. Текширувлар натижасида хорижлик фуқаролар томонидан содир этилган қатор қоидабузарликлар аниқланди.

Расмий маълумотларга кўра, Россияда бўлиш (яшаш) тартибини бузган Марказий Осиёдан келган 22 нафар шахсга нисбатан маъмурий баённомалар расмийлаштирилган. Шунингдек, рухсатномасиз меҳнат фаолиятини амалга оширган 36 нафар хорижлик фуқаро ҳам маъмурий жавобгарликка тортилган.

Бундан ташқари, ҳуқуқ-тартибот органлари хорижлик ишчиларни ноқонуний равишда ёллаган ва қонунчиликда белгиланган чекловларга риоя қилмаган иш берувчиларга нисбатан ҳам текширув ишларини бошлаган. Мигрантларга ўз ҳужжатларини ва меҳнат фаолиятини қонуний расмийлаштириш, шунингдек, иш берувчиларнинг фаолиятига оид қонуний талабларни инобатга олиш тавсия этилади.