Россияда пора беришга уринган ҳайдовчи ва йўловчиларга нисбатан жиноий иш очилди
Москва шаҳрида йўл-патруль хизмати (ЙПХ) ходимларига пора беришга уринган шахсларга нисбатан жиноят ишлари судга оширилди. Ҳуқуқ-тартибот органлари маълумотларига кўра, ҳайдовчилар ва йўловчилар маъмурий жавобгарликдан қочиш мақсадида ходимларга пул таклиф қилишган.
Биринчи ҳолатда, 34 ёшли ҳайдовчи ҳужжатлари (ҳайдовчилик гувоҳномаси ва суғурта полиси) йўқлиги ҳамда хавфсизлик камарини тақмагани учун тўхтатилган. У ЙПХ хизмат машинасида инспекторга 11 минг рубль миқдорида пора таклиф қилган. Инспектор пулни олишдан бош тортган ва ҳайдовчи қўлга олинган. Ҳозирда ушбу шахс ўз айбига иқрор бўлган.
Иккинчи ҳолатда эса, такси йўловчиси бўлган хориж фуқароси миграция қонунчилигини бузгани аниқлангач, инспекторга пора беришга уринган. Натижада ушбу шахс ҳам қўлга олиниб, унга нисбатан жиноят иши қўзғатилган.
Россия қонунчилигига кўра, мансабдор шахсга пора таклиф қилиш ёки бериш оғир жиноят ҳисобланади. Мигрантлар учун бундай ҳаракатлар нафақат жарима ёки қамоқ жазоси, балки мамлакатдан депортация қилиниш ва келгусида Россияга кириш тақиқланишига сабаб бўлиши мумкин. Мутахассислар йўл ҳаракати қоидалари ёки миграция тартиб-қоидалари бузилганда, қонуний йўл билан ҳаракат қилишни тавсия этади.
