Россиялик актриса ўзбекистонлик қурувчилар уни алдаб кетганини даъво қилмоқда

Россиялик таниқли актриса Вера Сотникова ўз ижтимоий тармоқларида уйини таъмирлаётган ўзбекистонлик ишчилар аванс пулини олиб, ишларни чала ташлаганча қочиб кетгани ҳақида видеомурожаат жойлаштирди. Актриса ўз чиқишида қурувчилар ташлаб кетган тартибсизликни кўрсатар екан, мигрантлар ва муайян миллатлар шаънига кескин фикрлар билдирган.

Актриса ишчиларнинг шахсий буюмлари ва идишларини тартибсиз қолдириб кетганини танқид қилди. У ҳудудда ётган таҳорат олинадиган кувшинларни кўриб, ишчиларни ҳатто ўзлари чой ичадиган идишларини ҳам йиғиштирмасдан, барча нарсани қаровсиз ташлаб кетганликда айблаган.

Сотникова қурувчиларнинг иш жойини бундай аҳволда ташлаб қочишини ҳазм қила олмай: "Булар ўзи ўзбекларми ёки лўлиларми (сиган)? Тезда ҳамма нарсани ташлаб кетиш улар учун нормал ҳолатми?" дея мигрантларнинг хатти-ҳаракатларини кескин савол остига олган.

Актриса ўзбек ишчиларидан ҳафсаласи пир бўлгани фонида бошқа миллат вакилларига ҳам тўхталган: "Ўзбеклар шундай қилди, тожиклар қандай йўл тутишини билмайман, лекин менимча, улар бундан ҳам баттар бўлиши мумкин" дея ўзининг салбий гумонларини билдирган ва ендиликда бундай вазиятларга лоял бўла олмаслигини айтган.

Видео сўнгида актриса қурилишни тўхтатмаслигини, балки янги бригада ёллашини маълум қилган. Аммо у навбатдаги ишчиларни ҳам олдиндан камситиб: "Бир гуруҳ аҳмоқлар (дураклар) кетса, уларнинг ўрнига бошқа аҳмоқлар келади" қабилида фикр билдирган.

Актриса Вера Сотникова мазкур ҳолат юзасидан Россия Мигратсия хизматига (ФМС) ариза беришини ва ишчилар унга етказилган зарарни тўламагунча ёки мамлакатдан чиқариб юборилмагунча тинчимаслигини таъкидлаган.