Россияда мигрантлар учун ижтимоий имтиёзларни бекор қилиш таклиф этилмоқда
Россиядаги ЛДПР партияси вакиллари мамлакат ҳудудларида меҳнат мигрантларига кўрсатилаётган ижтимоий ёрдам турлари бўйича ўтказилган мониторинг натижаларини эълон қилди. Партия маълумотларига кўра, айрим минтақаларда хорижликлар Россия фуқаролари билан тенг равишда турли нафақалар, болалар боғчаси ва мактаблар учун компенсациялар, шунингдек, тиббий хизматлардан фойдаланиш имкониятига эга.
Мониторинг доирасида мигрантлар учун мавжуд бўлган имтиёзлар қаторида болалар нафақалари, туғруқ учун тўловлар, бепул мактаб формаси, ўқув қуроллари, шунингдек, таълим муассасаларига устувор тартибда қабул қилиш каби чоралар қайд этилган. Айрим ҳудудларда эса мигрантларнинг ватанига қайтиш харажатларини қоплаш ёки иш билан таъминлаш хизматлари кўрсатилиши айтиб ўтилган.
Сиёсий ташкилот ушбу харажатларни тўлиқ аудитдан ўтказиш ва мигрантлар учун ажратилаётган минтақавий ёрдам турларини бекор қилишни талаб қилмоқда. Шунингдек, таклифлар қаторида Россия фуқароларини иш билан таъминлашда устуворлик бериш ва хорижлик меҳнат мигрантларининг оила аъзолари билан Россияга кириб келишини чеклаш масалалари ҳам илгари сурилган.
Ҳозирги вақтда ушбу таклифлар сиёсий партия даражасидаги ташаббус бўлиб, расмий қонунчилик ҳужжатларига ўзгартириш киритилмаган. Мигрантлар учун кўрсатиладиган ижтимоий ёрдам ва имтиёзлар тартиби Россиянинг ҳар бир ҳудудида амалдаги маҳаллий қонунчилик ва меъёрий ҳужжатлар асосида тартибга солинади.
