Россияда уй интернети кескин қимматлашиши ёки айрим ҳудудларда бутунлай йўқолиб қолиши мумкин
Россия Алоқа вазирлиги томонидан тайёрланаётган янги ислоҳот сабабли 50 миллиондан ортиқ фойдаланувчи сифатли ва арзон уй интернетидан маҳрум бўлиш хавфи остида қолди. Вазирлик хонадонларга интернет олиб кирувчи провайдерлар учун лицензия талабларини кескин кучайтиришни режалаштирмоқда.
Янги қоидаларга кўра, оддий уй интернети билан шуғулланувчи кичик операторлар учун универсал лицензия нархи 10 миллион рубль этиб белгиланиши, шунингдек, компаниянинг камида 100 миллион рубль ўз маблағи бўлиши талаб этилади. Энг асосий зарба эса якка тартибдаги тадбиркорларга (ЯТТ) берилади — уларга янги турдаги лицензиялар умуман берилмайди.
Бундай оғир молиявий шартларни ҳозирда фақат йиллик тушуми 400 миллион рублдан ортиқ бўлган йирик федерал компанияларгина бажара олади холос. Оқибатда, мамлакатда фаолият юритаётган 4,7 мингга яқин маҳаллий операторларнинг минглаб кичик фирмалари бозорни тарк этишга мажбур бўлади ва Россиянинг 27 та ҳудудида бирорта ҳам маҳаллий провайдер қолмаслиги мумкин.
Телеком-ассоциациялар ушбу ислоҳот бозордаги соғлом рақобатни йўқ қилиши ва тариф нархларининг ҳаддан ташқари кўтарилиб кетишидан огоҳлантириб, расмийларга қарши чиқмоқда. Вазирлик эса ҳозирча якуний тўхтамга келинмаганини ва ўзгаришлар бозор иштирокчилари билан муҳокама қилинаётганини билдирган.
