Россияда меҳнат мигрантларини ёллаш тизими ўзгариши мумкин

Россия меҳнат бозорида ишчи кучи танқислиги муаммосини ҳал қилиш мақсадида янги ёндашувлар муҳокама қилинмоқда. "Опора России" ташкилоти раҳбари Александр Калининнинг фикрича, мамлакат иқтисодиётига қўшимча 2 миллионга яқин хорижлик ишчи керак. Ҳозирги кунда Россиядаги хорижлик ишчилар сони 6 миллиондан 4 миллион кишига қисқаргани ушбу танқисликни янада кучайтирган.

Мутахассислар амалдаги патент тизимидан воз кечиб, ишчиларни уюшган ҳолда жалб қилиш (оргнабор) механизмига ўтишни таклиф этмоқда. Ушбу тизимда иш берувчи компаниялар ходимларни ўзлари излайди, рўйхатни шакллантиради, уларнинг келиш харажатларини қоплайди ва белгиланган квота асосида маълум муддатга ишга олади.

Таклиф муаллифларининг таъкидлашича, ҳозирги патент тизими хорижлик фуқароларга иш берувчи ва фаолият соҳасини эркин ўзгартириш имконини беради, бу эса баъзи ҳолларда шаффоф бўлмаган меҳнат муносабатларига олиб келиши мумкин. Уюшган ҳолда ишга жалб қилиш эса жараённи янада мақсадли ва назорат қилинадиган ҳолатга келтириши кўзда тутилган.

Россия иқтисодиётида меҳнат унумдорлигининг ўсиш суръати (ўртача 1,4%) мавжуд бўш иш ўринларини тўлиқ қоплаш учун етарли эмаслиги қайд этилган. Шу сабабли, хорижлик ишчиларни жалб қилиш тартибини ўзгартириш келгусида меҳнат миграцияси сиёсатида муҳим ўзгаришларга сабаб бўлиши мумкин.