ОАВ Трампнинг Украина бўйича янги тинчлик режаси тафсилотларини эълон қилди

Украинанинг “Главком” нашри ва бошқа оммавий ахборот воситалари АҚШнинг президенти Дональд Трамп вакиллари томонидан Москва ва Киевдаги музокараларда тақдим этилган бўлиши мумкин бўлган янги “тинчлик режаси” тафсилотларини ошкор қилди. Расмий матни ҳали эълон қилинмаган ушбу лойиҳа урушни тўлиқ тўхтатиш ва жиддий сиёсий ўзгаришларни назарда тутади.

Шундай қилиб, ОАВда эълон қилинган Трампнинг янги тинчлик режаси қуйидаги асосий шартларни ўз ичига олади:

*Ҳудудий ён беришлар ва қўшинларни олиб чиқиш: Украина Донбасс ва Запорожье вилоятининг бир қисмидан ўз қўшинларини (УҚК) олиб чиқиб кетиши лозим. Шунингдек, ушбу ҳудудларга БМТ контингенти жойлаштирилиши мумкинлиги айтилмоқда. Киев Россия назоратига ўтадиган ерларни ҳарбий йўл билан қайтариш фикридан воз кечиши керак.

*Конституцияга ўзгартиришлар киритиш ва референдум: Украина Конституцияга ўзгартиришлар киритилиб, унда ҳудудлардан воз кечилиши қонуний мустаҳкамланиши, шунингдек, референдумлар ва сайловлар ўтказилиши зарур.

*НАТОдан воз кечиш: Украина блокдан ташқари мақомини маҳкамлаши, НАТО ёки бошқа ҳарбий иттифоқларга аъзо бўлиш интилишларини тўхтатиши шарт.

*Армияни чеклаш ва тил масаласи: Украина Қуролли Кучлари (УҚК) сон жиҳатдан чекланади, мамлакатда рус тилини ҳимоя қилиш бўйича тил масаласида келишувлар имзоланади.

*Янги ҳукумат ва БМТ кафолати: Тинчлик шартномаси Украинанинг янги ҳукумати томонидан имзоланиши ва кейинчалик БМТда махсус тартиб орқали тасдиқланиши керак бўлади.

Ҳозирча ушбу музокараларнинг ҳеч бир иштирокчиси мазкур режанинг мазмунини расман тасдиқлагани йўқ.