Хориждан қайтган мигрантлар бизнесни ривожлантириш учун 60 млн сўм грант ютиб олиши мумкин

Миграция бўйича халқаро ташкилот (МХТ) ҳамда Миграция агентлиги ҳамкорлигида хориждан қайтган фуқаролар учун янги грант танлови эълон қилинди. Ушбу ташаббус Швеция Адлия вазирлиги томонидан молиялаштирилмоқда.

Танловда 2025–2026-йилларда хорижда ишлаб, Ўзбекистонга қайтган фуқаролар иштирок этишлари мумкин. Дастур доирасида бизнесни ривожлантириш бўйича аниқ ва асосланган ғояга эга бўлган, янги иш ўринлари яратиш ҳамда мавжуд бизнеснинг барқарорлигини таъминлашни мақсад қилган номзодларга устунлик берилади. Шунингдек, хотин-қизларнинг тадбиркорлик ташаббуслари алоҳида қўллаб-қувватланади.

Грант олиш учун аризалар жорий йилнинг 21-сентябрига қадар қабул қилинади. Қизиқувчилар махсус электрон шаклни тўлдиришлари ва ўз бизнес лойиҳаларини тақдим этишлари лозим.

Танлов шартлари ва ҳужжатларни топшириш бўйича қўшимча маълумотларни Миграция агентлигининг расмий каналлари ёки +998 90 021 50 38 Telegram рақами орқали олиш мумкин.