Россияда 18 ёшга тўлмаган мигрант фарзандлари қачон ишга жойлаша олади?
Россия қонунчилигига кўра, ўсмирлар 16 ёшдан, айрим ҳолларда эса 14-15 ёшдан бошлаб меҳнат фаолиятини бошлашлари мумкин. Бироқ, хорижий фуқаролар учун бу жараён ўзига хос ҳуқуқий талабларга эга.
Асосий қоида шундаки, ота-онанинг меҳнат патенти уларнинг фарзандларига нисбатан амал қилмайди. Меҳнат патентини фақат 18 ёшга тўлгандан кейингина мустақил равишда расмийлаштириш мумкин. Шу сабабли, патент асосида ишловчи мигрантларнинг вояга етмаган фарзандлари ушбу ҳужжат билан ишга жойлаша олмайдилар.
Бироқ, айрим тоифадаги вояга етмаганлар учун истиснолар мавжуд. Хусусан, Россияда вақтинча яшаш рухсатномаси (РВП) ёки доимий яшаш рухсатига (ВНЖ) эга бўлган ўсмирлар, шунингдек, Евроосиё иқтисодий иттифоқи (ЕОИИ)га аъзо давлатлар фуқаролари (масалан, Қирғизистон ва Қозоғистон) патент талаб қилинмасдан ишга киришлари мумкин.
Иш берувчилар вояга етмаган ходимлар билан меҳнат шартномаси тузишда Россия Меҳнат кодексига қатъий риоя қилишлари шарт. Қонунга кўра, ёшлар учун қисқартирилган иш вақти белгиланади. Шунингдек, уларни тунги вақтда, белгиланган меъёрдан ортиқча ёки соғлиқ учун хавфли бўлган шароитларда ишлатиш қатъиян тақиқланади.
