Екатеринбургдаги мактабда мигрантлар фарзандларининг улуши 98 фоизга етди

Екатеринбург шаҳридаги 149-сонли ўрта мактаб ўқувчиларининг таркиби бўйича ўзига хос рекорд ўрнатди — ундаги жами болаларнинг қарийб 98 фоизини Марказий Осиё республикаларидан келган муҳожирлар фарзандлари ташкил этмоқда.

Россиянинг «78» телеканали берган хабарга кўра, мазкур таълим муассасаси шаҳарнинг Железнодорожний тумани, Сортировочний мавзесида жойлашган. Бу ҳудуд азалдан муҳожирлар энг кўп истиқомат қиладиган маскан сифатида танилган.

Ўқувчилар таркибининг статистикаси:

Тожиклар: қарийб 70 фоизҚирғизлар: тахминан 15 фоиз Ўзбеклар: 10 фоиздан сал кўпроқ Маҳаллий аҳоли (руслар): атиги 2 ёки 3 фоиз

Мавзедаги маҳаллий аҳоли вакиллари ўз фарзандларини ушбу мактабга беришни деярли исташмайди. Оқибатда, мактаб биносида русча «здравствуйте» сўзидан кўра, ўзбек, тожик ва қирғиз тилларидаги «ассалому алайкум» ёки «салом» аликлари анча кўпроқ эшитилади.

Ижтимоий реакция ва тил муаммосиМактабдаги айрим ўқувчиларнинг рус тилини яхши билмаслиги ижтимоий тармоқларда кенг муҳокама ва ҳайратга сабаб бўлди. Кўпчилик фойдаланувчилар Россияда мактабга қабул қилиш учун рус тили бўйича мажбурий имтиҳонлар ва талаблар жорий этилган бир пайтда, тилни билмайдиган болалар қандай қилиб ўқишга қабул қилинаётгани ҳақида савол қўймоқда.

Маълумот ўрнида, бугунги кунда Тожикистон, Қирғизистон ва Ўзбекистон фуқаролари Россияга келаётган мигрантлар оқими бўйича энг юқори ўринларни эгаллаб келмоқда.