Турцияда ўзбекистонлик келин 5 миллион лиралик тилла билан ғойиб бўлди

Туркиянинг Муғла вилояти Милас туманида дабдабали тўйдан кейин ғайриоддий можаро келиб чиқди. Маълум қилинишича, уч кунлик тўй тантаналаридан сўнг келин ўзи билан тақиб юрган тилла ва тақинчоқларни олиб ғойиб бўлган, уларнинг қиймати 4–5 миллион лирага баҳоланмоқда.

Куёвнинг яқинлари келин ва тиллаларнинг йўқлигини пайқаб, ҳуқуқ-тартибот идораларига мурожаат қилишган. Тергов доирасида Ўзбекистон фуқароси бўлган келин қўлга олинди, бироқ у ўзини айбдор деб ҳисобламаслигини маълум қилди.

Келиннинг сўзларига кўра, у онасининг уйига кетган ҳамда ўзи билан фақат 20 та чораклик олтин танга ва 226 минг лира олган. Унинг яшаш жойида ўтказилган тинтувга қарамай, йўқолган деб даъво қилинаётган бошқа қимматбаҳо буюмлар топилмади.

Ҳозирги вақтда 4–5 миллион лирага баҳоланаётган тилла ва тақинчоқларнинг қаерда эканлиги номаълумлигича қолмоқда. Ҳодиса юзасидан тергов ҳаракатлари давом этмоқда.