Рязанда сохта рўйхатдан ўтган 19 нафар мигрант маъмурий жавобгарликка тортилди

Рязань шаҳрида ички ишлар органлари ходимлари томонидан миграция қонунчилигини бузиш билан боғлиқ навбатдаги ҳолатлар фош этилди. 33 ёшли маҳаллий фуқаро 2026-йилнинг май ва июнь ойлари давомида хорижлик фуқароларни ўзининг турар жойларига сохта йўл билан рўйхатга қўйиб келгани аниқланди.

Полиция маълумотларига кўра, аёл пул эвазига Марказий Осиё давлатларидан келган 19 нафар шахсни (16 эркак ва 3 аёл) ўз уйида ва квартирасида рўйхатдан ўтказган. Бироқ, текширувлар давомида ушбу фуқаролар кўрсатилган манзилларда умуман яшамаганлиги ва яшаш нияти ҳам бўлмаганлиги маълум бўлди.

Ушбу қонунбузарлик ортидан рўйхатдан ўтган 19 нафар хорижий фуқарога нисбатан Россия Федерацияси Маъмурий ҳуқуқбузарликлар тўғрисидаги кодексининг 18.8-моддаси бўйича маъмурий жавобгарлик чоралари кўрилди. Бу модда миграция қоидалари бузилганлиги учун жарима ёки мамлакатдан чиқариб юборишни назарда тутади.

Сохта рўйхатга олиш билан шуғулланган аёлга нисбатан эса Россия Жиноят кодексининг 322.2-моддаси (хорижий фуқароларни яшаш жойи бўйича сохта рўйхатга олиш) билан жиноят иши қўзғатилди. Ушбу моддага кўра, айбдор шахс 5 йилгача озодликдан маҳрум этилиши мумкин.