Россияга келган хорижлик болалар 30 кун ичида тиббий кўрикдан ўтиши шарт
Россия Федерациясига келган хорижлик фуқароларнинг фарзандлари учун тиббий кўрикдан ўтиш тартибига ўзгартиришлар киритилди. 1-сентябрдан бошлаб, 6 ёшдан ошган барча хорижлик болалар мамлакатга кириб келганидан сўнг 30 кун ичида тиббий кўрикдан ўтишлари мажбурий этиб белгиланди.
Болаларни тиббий кўрикдан ўтказиш учун олдиндан навбат олиш тавсия этилади. Навбатни "Gosuslugi" портали орқали олиш қулайроқ ҳисобланади, чунки Россия фуқаролари учун тизимда бўш вақтлар тезроқ топилади. Шу сабабли, уй эгасидан навбат олишда ёрдам сўраш мақсадга мувофиқ.
Миграцион ҳисоб (регистрация) масаласига келсак, вояга етмаган болалар учун тартиб ўзгармаган: улар аввалгидек уй эгаси билан бирга ички ишлар бўлимига (ОМВД) бориб, қоғоз шаклида рўйхатдан ўтишлари керак. "Амина" иловаси болаларга нисбатан қўлланилмайди.
Шунингдек, ота-оналар ўзларининг меҳнат патентлари асосида фарзандларининг рўйхатдан ўтиш муддатини узайтиришлари ва миграцион карталарига тегишли муҳрни бостиришлари шарт. Бу жараён қонуний асосда мамлакатда бўлиб туриш учун муҳим аҳамиятга эга.
