Новосибирскда тиббий кўрик нархи 3 баробарга ошди: мигрантлар нималарга дуч келмоқда?
Россия ИИВнинг Новосибирскдаги Паспорт-виза маркази (ПВС) филиалида тиббий кўрикдан ўтиш нархлари кескин ошгани маълум бўлди. Мигрантларнинг сўзларига кўра, агар аввал ушбу хизмат 4300 рублни ташкил этган бўлса, ҳозирда бу сумма қарийб 14 минг рублга етган.
Марказ мижозлари хизмат нархи билан бир қаторда ташкилотдаги тартиб-қоидалар, навбатларнинг кўплиги ва ходимлар муносабатидан шикоят қилишмоқда. Хусусан, ташриф буюрувчилар бинога кириш қатъий назорат қилиниши, ичкарида телефон ишлатиш тақиқлангани ва баъзи ҳолларда яқинлар билан боғланиш қийинлашганини таъкидлашган. Шунингдек, хизмат кўрсатиш муддатлари чўзилиб кетаётгани, ҳужжатлар тайёр бўлиши учун бир неча бор қайтиб келишга тўғри келаётгани айтилмоқда.
Расмий маълумотларга кўра, Паспорт-виза маркази ва тиббий хизмат кўрсатувчи ташкилотлар бир манзилда (Есенин кўчаси, 1Г) жойлашган бўлса-да, улар турли юридик шахслар ҳисобланади. Марказ операторлари мижозларга аввал инспектордан 500 рубл эвазига йўлланма олишни, сўнгра тиббий кўрикдан ўтишни тавсия қилмоқда. Бироқ, кўплаб мигрантлар амалда хизмат нархи ва жараённинг шаффофлиги бўйича ноаниқликлар сақланиб қолаётганидан норози.
Таъкидлаш жоизки, ушбу марказга ташриф буюрувчилар учун кутиш жойлари чекланган ва бино атрофида зарур инфратузилма етарли эмас. Ҳозирги вақтда журналистлар ва жамоатчилик вакиллари марказ маъмуриятидан нархлар сиёсати ҳамда хизмат кўрсатиш тартиби бўйича расмий изоҳ кутмоқда.
